ക്ഷേത്രരഹസ്യവും

   ക്ഷേത്രരഹസ്യവും         5               🙏
                          ദേവതകളും    

ബ്രഹ്മാണ്ഡംമുതൽ നമ്മുടെ കാരണശരീരംവരെയെത്തുന്ന ക്ഷേത്രസങ്കല്പമാണ് സനാതനമായ ക്ഷേത്രസങ്കല്പം; ഭാരതത്തിൻ്റെ ശ്രുതിസ്മൃതികളിലെ ക്ഷേത്രസങ്കല്പം.എല്ലാ പുരാണങ്ങളിലും ഇതിഹാസങ്ങളിലും ഗീതയിലുമെല്ലാം ആ ക്ഷേത്രത്തെ നിലിർത്തുന്നതിനാണ് ശ്രമിച്ചിട്ടുള്ളത്.ഗീതയെ ഈ നിലയിൽ പഠിച്ചാൽ, അർജുനൻ്റെ ശരീരത്തിൽ ഇരിക്കുന്ന അർജുനനെന്ന ബോധത്തെ,അർജുനൻ മനസ്സിലാക്കുന്ന ഒരു കാലത്തു മാത്രമേ,അർജുനൻ തൻ്റെ സാമ്രാജ്യത്തിൻ്റെ അധിപതിയാകുകയുള്ളുവെന്നു കാണാം - സ്വരാട്ടാകുകയുള്ളു.അതാണ് ശാന്തിയുടെ വഴിയും; അതാണ് ഗീതയുടെ വിഷയവും - സാമ്രട്ടിൻ്റെതല്ല.സാമ്രട്ടും സ്വരാട്ടും തമ്മിൽ ഒരു പാട് വ്യത്യാസമുണ്ട്.സ്വരാജ്യത്തിൽ ആനന്ദിക്കുന്നവനാണ് സ്വരാട്ട്. സ്വരാജ്യം - ശരീരസാമ്രാജ്യം.അത് ആരോഗ്യമുള്ളതായിരിക്കണം.എൻ്റെ ഇന്ദ്രിയങ്ങളൊക്കെ നല്ല ആരോഗ്യമുള്ളതായിരിക്കണം.വേണ്ടത് കേൾക്കണം,വേണ്ടാത്തത് കേൾക്കരുത്; വേണ്ടത് പറയണം, വേണ്ടാത്ത് പറയരുത്; വേണ്ടതിലേ സ്പർശിക്കാവു , വേണ്ടാത്തതിലൊന്നും സ്പർശിക്കരുത് - ഇങ്ങനെ അഞ്ച് ഇന്ദ്രിയങ്ങളെയും ബോധത്തിൻ്റെ നിയന്ത്രണത്തിൽ നിർത്തുവാൻ മാത്രമല്ല, ആ ഇന്ദ്രിയങ്ങൾ ഉൽപോഷിതങ്ങളായി, അറിവുകളെൻ്റെ ബോധത്തിനാന്ദോളനം വരുത്താതെ, സംഘർഷം വരാതെ, ഒന്നിനോടും ഏറ്റുമുട്ടാതെ നിർത്താൻ കഴിയണം.അതിനു കഴിയാതെവന്നാൽ എൻ്റെ അഞ്ച് ഇന്ദ്രിയങ്ങൾകൊണ്ടുള്ള ജീവിതം കിട്ടിട്ട് എനിക്ക് ഒരു പ്രയോജനവുമില്ലാതാകും.

പലരുടെയും ശരീരത്തിൽ ഈ ഇന്ദ്രിയങ്ങൾ പ്രവർത്തിക്കുന്നത് പല വിധത്തിലാണ്.ഇന്ദ്രിയങ്ങളെ സമീചീനമായി നിർത്തുവാൻ പാകത്തിൽ പര്യാപ്തമാകുമാറ്, ഈ സ്ഥൂലശരീരത്തെ - ഇന്ദ്രിയങ്ങളെ - ക്ഷതമില്ലാതെ ആരാധിക്കണം.ഒരു നിമിഷം ശരീരബോധത്തിൽനിന്ന് ഞാനൊന്ന് മാറിയാൽ, പരിക്ലിപ്തിയില്ലാത്ത അനന്തസങ്കല്പങ്ങളിൽ ഞാൻ ഭ്രമിക്കുന്നവനാകും.മനോബുദ്ധിയഹങ്കാരങ്ങളെയും ചിത്തത്തെയും ഇന്ദ്രിയശക്തികളെയും പ്രാണന്മാരെയും കൂട്ടുപിടിച്ച്, ഞാൻ നടത്തുന്ന സാങ്കല്പികസാമ്രാജ്യങ്ങളിലൂടെയുള്ള എൻ്റെ യാത്രകളെയാണ്! എൻ്റെ അഞ്ച് പ്രാണന്മാർ - പ്രാണൻ,അപാനൻ,വ്യാനൻ,ഉദാനൻ, സമാനൻ.ഇതിലൊരുത്തനൊന്ന് നമ്മളോട് തെറ്റിയാൽ, എൻ്റെ സങ്കല്പങ്ങളാകെ മാറിമറയും.എൻ്റെ മനസ്സും ബുദ്ധിയും അഹങ്കാരവും ചിത്തവും - സങ്കല്പവികല്പങ്ങളാകുന്ന മനസ്സ്, ചിന്തനകർതൃവായ ചിത്തം, നിശ്ചയാത്മികയായ ബുദ്ധി, ഞാനെന്ന എൻ്റെ അഹങ്കാരം, കണ്ണടച്ചിട്ടും കാണുന്ന എൻ്റെ കണ്ണ്, ചെവി പൊത്തിപ്പിടിച്ചിട്ടും കേൾക്കുന്ന എൻ്റെ ചെവി, ഉറങ്ങിയാലും കാണുകയും കേൾക്കുകയും അനുഭവിക്കുകയും ചെയ്യുന്ന എൻ്റെ സ്വപ്നലോകങ്ങൾ - ഇവയൊക്കെയും ഞാൻ സ്വച്ഛന്ദമാക്കിവെച്ചില്ലെങ്കിൽ, സ്വപ്നങ്ങളോടു കലരുന്ന എൻ്റെ ജാഗ്രത്തുമായി ചേർത്ത് എൻ്റെ ചുറ്റുപാടുകളോടെല്ലാം ഞാൻ മല്ലടിക്കും - ഹിന്ദുവിനെ ഉദ്ധരിക്കാൻ വേണ്ടി ആധുനികൻ ഒരു ക്ഷേത്രം കെട്ടിയുണ്ടാക്കി, മറ്റു മതക്കാരെയൊന്നും അതിലേക്ക് കടക്കാനിടയാകാത്തവിധത്തിൽ, നമ്മുടെ മതത്തിന്  വികാസപരിണാമമുണ്ടാക്കാനും നന്നാകാനും പ്രതിമാപൂജയിലൂടെ സാക്ഷാത്കാരം ലഭിക്കാനും ഇരുന്നു ചിന്തിക്കുമ്പോഴാണ്,  പുതിയ ഭരണസമിതിയിൽ എൻ്റെ പ്രസിഡൻ്റ് പദവിക്കെതിരേ വരുന്ന നോമിനി ജയിച്ചത് ഞാനറിയുന്നത്.തിരഞ്ഞെടുപ്പിൽ ഈ ഞാൻ തോറ്റുപോയാൽ, ഭാര്യയോടും മക്കളോടും ഞാൻ പറയും ക്ഷേത്രത്തിൻ്റെ ആ മതിലിനകത്ത് കയറിപ്പോകരുതെന്ന് .കയറിയാൽ നിൻ്റെയൊക്കെ കാലു ഞാൻ തല്ലിയൊടിക്കുമെന്ന്.അതുകൊണ്ട് നിങ്ങളുടെ ഇന്നത്തെ ക്ഷേത്രത്തിൻ്റെ പ്രശ്നം ക്രിസ്ത്യാനിയോ മുസ്ലിമോ ഒന്നുമല്ല - നിങ്ങളുടെ ഇന്നലത്തെയും ഇന്നത്തെയും പ്രസിഡൻ്റ് മാരും സെക്രട്ടറിമാരുമൊക്കെയാണ്.അതുകൊണ്ട്,പൊതുവായ ആരാധനാക്രമമുണ്ടാക്കിയതുകൊണ്ടോ ഏകതാനതയുണ്ടാക്കിയതുകൊണ്ടോ നിങ്ങൾക്ക് ഐക്യമൊന്നും ഉണ്ടാകണമെന്നില്ല.

മാനവമനസ്സിൻ്റെ ഐക്യം സ്വരാട്ടിലന്തർലീനമാണ്.തൻ്റെ അന്തഃസ്ഥിതമായ ചൈതന്യത്തെയും അതു കുടികൊള്ളുന്ന ജീവകലകളെയും അതിലിരിക്കുന്ന സ്ഥൂലസൂക്ഷ്മകാരണദേഹങ്ങളെയും തിരിച്ചറിഞ്ഞ് ആരാധിക്കമ്പോഴാണ് - അതുതന്നെയാണ് അപരനിലുമെന്ന് ബോധ്യപ്പെടുന്നൊരു നാളിൽമാത്രമാണ് - ഞാനും അപരനുമില്ലാതാകുന്ന ആത്മസത്തയുടെ അത്യന്തസൂക്ഷ്മവും  അതീവസുന്ദരവുമായ ഐതിഹാസികത ഉണരുക.അതാണ് ആരാധനയുടെ കേന്ദ്രബിന്ദു.അതിനെ ഉണർത്താനുള്ളതെല്ലാം ആലയമാണ്; അത് ഉണരുന്നിടങ്ങളിലെല്ലാം ശാന്തിയാണ്.

ശാന്തിക്കും യോജിപ്പിനും പ്രാഥമികാരാധനയ്ക്കും വേണ്ടി പടുത്തുയർത്തിയ മതങ്ങളുടെ ഈറ്റില്ലങ്ങളിൽനിന്നാണ് അതുണ്ടാകുന്നതിനുമുൻപുള്ള മനുഷ്യൻ്റെ യോജിപ്പ് പിന്നെ,വിയോജിപ്പും എതിർപ്പുമായി രൂപാന്തരപ്പെട്ടു വന്നത്.ലോകമെമ്പാടും ഒന്നായ ക്രസ്തുമതം, ആദ്യത്തെ സെൻ്റ് പീറ്റേർസ് ബസലിക്കയുടെ തറക്കല്ലിട്ടപ്പോഴാണ് രണ്ടായത്.മാർട്ടിൻ ലൂതർ തനിക്ക് പണപ്പിരിവിന് അനുമതി തരുമെന്ന് വിചാരച്ച് കാത്തിരിക്കുമ്പോൾ പ്രശസ്തമായ പാർഡൻ (Pardan)ടിക്കറ്റ്, ദണ്ഡവിമോചനകാർഡുകൾ - അതാണിപ്പോൾ ഹിന്ദുമതവും അടിച്ചുകൊടുക്കുന്നത് - ഈ ദണ്ഡവിമോചനകാർഡിൻ്റെ അവകാശവാദത്തിലാണ് പള്ളി രണ്ടായത്; പിന്നെ നാലയത്; പിന്നെ ആറായത്.ആയിരത്തിയറുന്നൂറ്റിപ്പതിനാറെണ്ണമായി ലോകത്താകെ പൊട്ടിപ്പിരിഞ്ഞ് നില്ക്കുകയാണിപ്പോൾ.നിങ്ങളും ആരാധനയുടെ ബാഹ്യതലങ്ങളിലെ വ്യത്യാസങ്ങളിലാണ് ജാതിയും ഉപജാതിയുമൊക്കെയായി ഇന്ന് പിരിഞ്ഞു നില്ക്കുന്നത്.🙏             തുടരും.......